काठमाडौं । नेपाली कांग्रेसकी सांसद सरिता प्रसाईंले अख्तियारमा राजनीतिक नियुक्ति बन्द गर्न माग गरेकी छिन् ।

सिंहदरबारमा मंगलबार बसेको राज्यव्यवस्था तथा सुशासन समितिको बैठकमा सांसद प्रसाईंले राजनीतिक नियुक्तिका कारण अख्तियारमाथिको जनविश्वास घटेको बताइन् ।

उनले भनिन्, ‘अख्तियारको प्रमुखमा राजनीतिक मान्छे नराखौँ । त्यसको छानबिनलाई जनताले भर गर्न छोडिसके ।’

सांसद प्रसाईंले भनिन्, ‘प्रधानमन्त्री ओलीज्यू तपाईं र हाम्रो सभापति शेरबहादुर देउवा अब धेरै लामो समय राजनीतिमा रहनुहुने छैन । त्यसकारण तपाईंहरूले देशलाई ट्रयाकमा हुलिदिनुस् ।’

उनले शीर्ष नेताले सक्रिय राजनीतिमा हुँदा स्वार्थ हेरे पनि अब देशलाई एउटा ट्रयाकमा अघि बढ्ने आधार तयार गर्नुपर्ने बताएकी छिन् ।

भष्ट्राचार निवारण ऐन २०५९ संशोधनसम्बन्धी विधेयकमाथि छलफलमा भाग लिन पुगेका प्रधानमन्त्री केपी ओलीलाई सांसद प्रसाईंले राजनीतिक नियुक्तिका कारण अख्तियारमाथिको जनविश्वास घटेको बताएकी हुन् ।