काठमाडौं । बङ्गलादेशमा भएको परिस्थितिपछि सरकारले नेपाल–भारत सीमा क्षेत्रको सुरक्षा व्यवस्थालाई कडाइ गराएको छ ।

सोमबार सिंहदरबारमा बसेको केन्द्रीय सुरक्षा समितिको बैठकले सिमानामा सुरक्षा व्यवस्था कडाइ गर्न निर्देशन दिएको हो ।

गृहमन्त्री रमेश लेखकको अध्यक्षतामा बसेको समितिको बैठकले बङ्गलादेशमा भएको तनावपूर्ण राजनीतिक घटनाक्रमसँगै त्यसले नेपालमा पार्ने असरका बारे समीक्षा गरेको छ ।

स्थल नाकाबाट हुने आवत् जावत्लाई व्यवस्थित गर्न तथा मानिसको चेकजाँचमा कडाइ गर्न निर्देशन दिएको गृहमन्त्री लेखकले बताएका छन् ।

गृहमन्त्री लेखकले बङ्गलादेशमा विकसित घटनापछि चार वटै सुरक्षा निकायका उच्च अधिकारीहरुसहितको बैठक आह्वान गरेका थिए ।

गृहसचिव एकनारायण अर्याल, नेपाली सेनाका बलाधिकृत रथी अशोक सिग्देल, प्रहरी महानिरीक्षक बसन्तबहादुर कुँवर, सशस्त्र प्रहरी महानिरीक्षक राजु अर्याल, राष्ट्रिय अनुसन्धान विभागका प्रमुख हुतराज थापा सहितका उच्च सुरक्षा अधिकारीहरु सहभागी थिए ।

बङ्गलादेशको घटना र त्यसले नेपाललाई पार्न सक्ने असरका विषयमा समीक्षा भएको छ ।

विगतमा म्यानमारबाट रोहिंग्या र अफगानिस्तानमा तालिवानले सत्ता हातमा लिएपछि त्यहाँका नागरिक गैरकानूनीरुपमा भारत हुँदै नेपाल प्रवेश गरेका थिए ।

यसपटक त्यस्तै किसिमका घटना दोहोरिन नदिन सोहीअनुसार सीमानामा सुरक्षा सावधानी अपनाउनुपर्ने विषयमा समीक्षा भएको छ ।