काठमाडौं । नेपाली कांग्रेसका नेता शंकर भण्डारीले कांग्रेस र एमाले मिलेर बनेको नयाँ सरकार राष्ट्रिय सहमतिको सरकार भएको बताएका छन् ।

सोमबार नेता भण्डारी विज्ञप्ति जारी गरेर कांग्रेस र एमाले मिलेर गठन भएको नयाँ सरकारलाई ठूलो समर्थन रहेको बताए । उनले अन्य धेरै दलहरू समेत सरकारमा संलग्न भएर बनेको भन्दै अहिलेको केपी ओली नेतृत्वको सरकार राष्ट्रिय सहमतिको सरकार रहेको बताए ।

उनले भने, ‘राजनीति मूलतः देश र जनताका लागि गर्ने हो । देशमा देखिएका तमाम समस्याको समाधान गर्दै मुलुकलाई समृद्धिको मार्गमा लैजानको लागि दुई राजनीतिक दलले देखाएको अग्रसरता सह्रानीय छ ।’

‘जनताले निकै उत्साहका साथ यसको सफलताको कामना गरेकाले पनि यो सरकारलाई असफल हुने छुट छैन’, नेता भण्डारीले भने ।

‘यो सरकारलाई सफल बनाउन, देश र जनताको हितमा काम गर्ने वातावरण तयार पार्न तथा नागरिकको जीवनलाई सहज बनाउनका लागि हिजोको भन्दा थप मेहनतका साथ काम गर्नु हामी सबैको दायित्व हो’, भण्डारीले भने ।

‘म राजनीतिमा लाग्नुको लक्ष्य नै देश र जनताको सेवा गर्न हो’, उनले भने, ‘राष्ट्र र राष्ट्रियताको संरक्षण तथा संवर्धन मेरो जीवनको अन्तिम उद्देश्य हो ।’