काठमाडौं । नेपाली कांग्रेसले सबै दलहरूसँग परामर्श गरेर एमालेका अध्यक्ष केपी ओलीको नेतृत्वमा राष्ट्रिय सहमतिको सरकार बनाउन पहिल भइरहेको जनाएको छ ।

मंगलबार बिहान बुढानिलकण्ठस्थित सभापति शेरबहादुर देउवाको निवासमा बसेको पूर्वपदाधिकारी र पदाधिकारीहरूको बैठकमा राष्ट्रिय सहमतिको सरकारका विषयमा एमालेसँग समझदारी भएको विषयमा छलफल भएको हो ।

बैठकपछि पत्रकारसँग कुरा गर्दै प्रवक्ता डा.प्रकाशशरण महतले भने, ‘आर्थिक स्थिति र विकास निर्माणमा देखिएको अन्यौलको स्थिति छ । त्यसलाई पनि अन्त्य गर्नको लागि स्थिर राजनीतिक र संविधानलाई समसामयिक रुपमा संशोधन गर्ने, त्यसमा एउटा सहमति जुटाउने हिसाबले अगाडि बढ्नको लागि दुई दलको बीचमा सँगै अगाडि बढ्ने, सरकार निर्माण गरेर अगाडि बढ्ने र त्यसमा आवश्यक्ता अनुसार अन्य दलहरूलाई पनि समावेश गर्ने ।’

‘त्यस कारण राष्ट्रिय सहमतिको सरकार कै नाम दिइएको छ । एमालेका अध्यक्ष केपी ओलीजी र हाम्रो पार्टी सभापति आदरणीय शेरबहादुर देउवाज्यू आलोपालो नेतृत्व गर्ने । नेतृत्व चाहिँ कांग्रेस र एमालेकै हुन्छ । निर्वाचनसम्म । र, त्यसमा अरु दललाई पनि संलग्न गर्न सकिन्छ । आधार नै समझदारीमा भएको छ ।’

कांग्रेसका प्रवक्ता डा.महतले सभापति देउवा र एमालेका अध्यक्ष ओलीले हिजो राति राष्ट्रपतिलाई भेट गरेको भनेर आएका समाचारहरूको खण्डन गरेका छन् । उनले भने, ‘हिजो सञ्चारमाध्यममा पार्टी सभापति शेरबहादुर देउवा राष्ट्रपतिकोमा पुग्नुभयो । ओलीजी पुग्नुभयो भन्ने कुरामा कुनै सत्यता छैन ।’

‘संविधानका सम्बन्धमा आयोग बनाउन, ड्राफ्ट बनाउने कुरामा पनि कुनै सत्यता छैन । मूलभुत रुपमा संविधान संशोधनको सैद्धान्तिक विषय र स्थिरताको विषय । आर्थिक विकास र आर्थिक वृद्धिमा जुन समस्या देखिएको छ त्यसलाई समाधान गर्नको लागि ठूला दलहरू एकठाउँमा आएर सुनिस्चितता दिने मूल आशयका साथ वृहत्तर राष्ट्रिय हितमा यो समझदारी बनेको छ’, डा.महतले भने ।

‘मन्त्रालय र प्रदेशका विषयमा कुनै सहमति भएको छैन । अवश्य छलफल हुन्छ । कसरी जाने भन्ने विषयमा छलफल हुन्छ’, उनले भने ।

‘अहिले सरकारको नेतृत्व दुई ट्रममा क–कसले गर्छ भन्ने निर्णय हुन्छ । पार्टीबाट कसले नेतृत्व गर्छ भन्ने कुरा टुङ्गो छैन । व्यवहारिक रुपमा हुन्छ’, डा.महतले भने ।

‘राष्ट्रिय सरकारको निम्ति नै हामी केन्द्रित हुन्छौं । संविधान संशोधनमा दुईतिहाई मात्रै पु¥याउनेभन्दा पनि राष्ट्रिय सहमति गर्छौं’, उनले भने ।

‘दुइटा दल एकठाउँमा नआएसम्म अस्थिरताको जडको लामो सृङ्खलाबाट गुज्री रहेका छौँ । संविधानमै अफ्ठ्यारो छ । कांग्रेस र एमाले एक ठाउँमा अनुपर्छ भन्ने राष्ट्रिय आवश्यक्ता नै देखियो । सत्तामा जसरी त्यसरी जानुपर्छ मान्यताभन्दा धेरै माथि उठेर यो समझदारी भएको छ’, प्रवक्ता डा.महतले भने ।

प्रधानमन्त्रीले राजीनामा दिनुभएन भने के गर्ने प्रश्नमा डा.महतले भने, ‘यो विषयमा मैले धेरै जवाफ दिइरहनु पर्ने आवश्यक्ता छैन ।’

उनले भने, ‘देशका महत्वपूर्ण मुद्दाहरू छन् । संविधानको संशोधन । यी तमाम मुद्दाहरूलाई एकीकृत गरेर मात्रै हामी यो सरकार निर्माणको कुरामा संलग्न हुन्छौँ । खाली सत्तामा जानको लागि मात्रै हामी यो समझदारी बनाउँदैनौँ ।’

‘जनताको मुद्दा र चासोलाई केन्द्रमा राखेर एमाले पार्टीसँग समझदारी भएको छ । त्यो समझदारीमा मूलभुत रुपमा स्थायित्वको मूल समस्या छ । जनता पनि चिन्तित छन् । त्यसले आर्थिक स्थिति सुध्रिनको लागि पनि अफ्ठ्यारो पारेको छ । अन्यौलको पनि स्थिति सिर्जना भएको छ’, डा.महतले भने ।