सभापति देउवाद्वारा ओलीसँगको भेटवार्ताबारे पदाधिकारीहरूलाई जानकारी गराए

काठमाडौं । नेपाली कांग्रेसका सभापति शेरबहादुर देउवाले एमालेका अध्यक्ष केपी ओलीसँग भएको भेटघाटका बारेमा पदाधिकारीहरूलाई जानकारी गराएका छन् ।

सोमबार बुढानिलकण्ठस्थित निवासमा बसेको पदाधिकारी र पूर्वपदाधिकारीहरूको बैठकमा देउवाले ओलीले चिया खान बोलाएपछि गएको र कुराकानी भएको जानकारी गराएका छन् ।

बैठकपछि पत्रकारसँग कुरा गर्दै प्रवक्ता डा.प्रकाशशरण महतले भने, ‘छलफल चाहिँ ठूलो पार्टीको हैसियतले सत्तामा नेपाली कांग्रेस पुग्नुपर्छ । सत्तामा जानुपर्छ भन्ने कुरा अनौठो विषय भएन । तर, यो विषयमा यो बैठकमा छलफल भएको छैन ।’

‘तथापि नेतृत्व तहले विभिन्न दलहरूसँग छलफल गरिरहेको छ । राष्ट्रिय मुद्दाहरूमा छलफल गरिरहेको छ । हाम्रो लागि मोर्चा प्रमुख कुरा हो । सत्तामा जानको लागि सत्ता हाम्रो प्राथमिकताको विषय होइन’, डा.महतले भने ।

‘मुद्दाहरूमा एकरुपता आयो, दीर्घकालीन रुपमा अगाडि जाने परिस्थिति बन्यो, त्यो अवस्थामा यो विषयले प्राथमिकता पाउँछ । ती सबै मुद्दाहरूमा छलफल गर्दा एकठाउँमा उभिने परिस्थिति हुँदा यो कुरा अगाडि बढ्ने कुरा हो । त्यस कारण यो विषयमा बोल्नु परिपक्व भइसकेको छैन’, प्रवक्ता डा.महतले भने ।

‘परिपक्व नभइ यो विषयमा बोल्नु उपयुक्त हुँदैन । मूल कुरा हाम्रा लागि मुद्दा हो । विनामुद्दा नेपाली कांग्रेसले खाली सरकारमा जानको लागि प्राथमिकतामा राख्दैन’, उनले भने ।

‘दीर्घकालीन रुपमा सरकार चल्ने, परिणाम मूलक काम गर्न सक्ने । अस्थिरता छ । त्यसको अन्त्य हुन सक्ने । संविधानको निर्वाचन पद्धतिले ल्याएका कम्पिकेशनलाई कम गर्न सक्ने र देशलाई स्थिरता र समृद्धितर्फ उन्मुख गराउन सक्ने, परिस्थितिमा मात्रै हामीले यो विषयलाई बिचार गर्छौं’, डा.महतले भने ।

प्रचार विभागका प्रमुख मीनबहादुर विश्वकर्माले भने, ‘शीर्ष नेताहरू । मुख्य राजनीतिक दलका नेताहरू र प्रमुख प्रतिपक्ष दलका नेता शेरबहादुर देउवा नै छलफलमा रहनु हुँदा अनुमानमा रहनु स्वभाविक हो ।’

‘आज उहाँले यति मात्रै भन्नुभयो चिया खान बोलाउनुभयो । हामी गयौँ । बस्यौँ । र, सौहार्दवातावरणमा कुराकानी भयो । अहिले हाम्रो सम्बन्ध सकारात्मक र सुदृढ छ’, नेता विश्वकर्माले भने ।

Published : Monday, 2024 July 1, 5:58 pm

फेसबुकबाट तपाईको प्रतिक्रिया