घोराही । सरकारले तोकेको न्यूनतम ज्याला नपाएको भन्दै घोराही सिमेन्ट उद्योगका श्रमिकले दाङमा प्रदर्शन गरेका छन् ।

शनिबार उद्योग र श्रमिक सप्लायर्स कम्पनीको मिलेमतोका कारण आफूहरूले सरकारले तोकेको न्यूनतम पारिश्रमिक नपाएको भन्दै प्रदर्शन गरेका हुन् । उनीहरूले शनिबार घोराही उपमहानगरपालिकाको गोग्लीस्थित घोराही सिमेन्ट उद्योग मूल गेटमा प्रदर्शन गरेका छन् ।

श्रमिकहरूले न्यूनतम पारिश्रमिक, बैंक खातामा तलब भुक्तानी, सामाजिक सुरक्षा कोष र वातावरण संरक्षण जस्ता माग राखेका छन् ।

प्रदर्शनकारी मजदुरहरूले सरकारले दैनिक ६६८ रुपियाँ न्यूनतम ज्याला तोकेको भए पनि उद्योगले बीचमा श्रमिक सप्लायर्स कम्पनी खडा गरी वर्षौंदेखि प्रतिव्यक्ति प्रतिदिन २०० रुपियाँसम्म ठगी गरेको बताएका छन् ।

श्रमिकहरूले सप्लायर्स कम्पनीले बैंक खातामा तलब नदिई हाल प्रतिदिन ५०० रुपियाँको दरले मात्र दिने गरेको बताएका छन् ।

राष्ट्रिय स्वतन्त्र पार्टीका नेता विशाल अधिकारीले विगत १० वर्षमा स्थानीय श्रमिकको २५ करोड रुपियाँभन्दा बढी ठगी गरिएको तथ्याङ्क पाएको बताएका छन् ।

घोराही सिमेन्टको व्यवस्थापनको काम हेर्दै आएका अमर सुबेदीले श्रमिकहरूलाई निकै दुःख दिँदै आएका छन् । सुवेदीका विषयमा पटक पटक आवाज र उजुरी भएका छन् तैपनि सुनुवाइ भएको छ ।