काठमाडौं । राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर शाही (ज्ञानेन्द्र)ले आकस्मिक समयमा बोल्ने क्रममा सभामुख देवराज घिमिरेले फेरि पनि माइक बन्द गरिदिएका छन् ।

शुक्रबार बसेको प्रतिनिधि सभाको बैठकमा आकस्मिक समयमा राप्रपाका सांसद शाहीले विभिन्न विषयमा धारणा राखेका थिए । शाहीलाई समय दिने बेला सभामुख घिमिरेले संक्षिप्तमा कुरा राख्न समय दिएका थिए ।

सभामुख घिमिरेले संक्षिप्त भने पनि सांसद शाहीलाई बोल्ने समय तोकेका थिएनन् । शाहीले पनि आफ्ना कुरा छोट्याउने तयारी गरिरहेका बेला सभामुख घिमिरेले माननीय छोट्याउनुस्, सिध्याउनुस् भनेर दवाव दिएका थिए ।

त्यसपछि सभामुख घिमिरेले राप्रपाका सांसद शाही बोलेर नसकिँदै माइक काटिदिएका थिए । शाहीले बोल्न पनि नपाइने भनेर प्रतिवाद गर्न खोजेपछि सभामुख घिमिरेले अर्को सांसदलाई समय दिएर शाहीलाई बस्नुस् माननीय भनेर बैठक अगाडि बढाएका थिए ।

राप्रपाका सांसदको माइक काटिएको यो पहिलो घटना होइन । यसअघि पनि पटक पटक सांसद शाहीले बोल्दाबोल्दै माइक काट्ने कार्य सभामुख घिमिरेबाट भएका छन् ।

एमालेबाट सभामुख बनेका घिमिरेले आफूलाई निकै निरंकुश बनाउँदै लगेको र संसदलाई निष्पक्ष रुपमा सञ्चालन गर्न नसकेको भनेर आरोप लाग्दै आएको छ ।