कांग्रेस सांसद बस्नेतले गृहमन्त्री लामिछानेको नाम नलिएर सहकारीको ठगीमा दुःखपाएका व्यक्तिको कथा सुनाए

काठमाडौं । नेपाली कांग्रेसका नेता एवम् पूर्वमन्त्री मोहनबहादुर बस्नेतले गृहमन्त्री रवि लामिछानेको नाम उल्लेख नगरेर सहकारी ठगी गरेका कारण हजारौँ सर्वधारणले दुःख पाएको बताएका छन् ।

शुक्रबार बसेको प्रतिनिधि सभाको बैठकमा विशेष समय लिएर बोल्दै सांसद बस्नेतले मन्त्री र नेताहरूले सहकारीको अर्बौ रकम अपचलन, ठगी गर्दा धेरै मानिसहरूले औषधि खाने पैसा समेत नरहेको बताए ।

उनले भने, ‘अलिअलि सहकारीका कुरा…हुन त यो छानविन कमिटी बनिसकेको छ । संसदीय छानविन समिति । यो पनि यो दुध व्यवसाय जस्तै स्कुलमा पढ्ने विद्यार्थीको हालत जस्तै अथवा अरु ठाउँमा लगानी गरेर आफ्नो परिवार पाल्नुपर्ने जस्तै ।’

‘यसबाट मैले एउटा न्यूज हेरेको थिएँ । एउटा प्रोफेसरले ५६ वर्ष पढाएको रे ! भएभरको पैसा लगेर लगानी गर्नुभयो’, बस्नेतले भने, ‘त्यसपछि उहाँ अहिले बिरामी हुनुहुन्छ, सिकिस्त । औषधि खाने पैसा छैन ।’

उनले भने, ‘अनि हाम्रा नेताहरू, मन्त्रीज्यूहरू त्योसँग सम्बन्धित नेताहरू ठूलाठूला कुरा गरेर आफू फुस्किनु भएको छ । तर, भाषण गरिदिनु हुन्छ यसको व्याजसम्म असुल्न नसक्दासम्म बिश्राम लिन्न भन्नु हुन्छ ।’

‘तर, चाहिँ पुलिसलाई थर्काएर विभिन्न किसिमका प्रतिवेदनहरू गुपचुपमा राख्ने लुकाउने काम भइरहेको छ’, सांसद बस्नेतले भने ।

‘एउटा चाहिँ संसदीय छानविन समिति बनिसकेको अवस्था छ । यसलाई माननीय सदस्यज्यूहरूले अलिक बढि सक्रियता देखाउनु भएर चाँढो निष्कर्षमा पुर्‍याउने अवस्था आयो भने त्यसले ठूलो राहत पाउँछ’, उनले भने, ‘पहिरो कति गइसकेको छ म धेरै बोल्न चाहन्न ।’

Published : Friday, 2024 June 28, 6:10 pm

फेसबुकबाट तपाईको प्रतिक्रिया