कांग्रेसद्वारा सत्तापक्षसँगको सहमति अनुमोदन, लामिछानेको गोरखा मिडियामा संलग्न व्यक्तिमाथि अनुसन्धान हुने

काठमाडौं । नेपाली कांग्रेसले सहकारीको रकम अपचलनसम्बन्धी संसदीय छानबिन समिति बनाउन दलहरूबीच भएको सहमितलाई अनुमोदन गरेको छ ।

मंगलबार संसद भवनस्थित ल्होत्से हलमा बसेको कांग्रेस संसदीय दलको बैठकले संसदीय छानविन समिति गठनबारे सत्तापक्षसँग भएको सहमतिलाई अनुमोदन गरेको हो ।

कांग्रेसका प्रमुख सचेतक रमेश लेखकले बैठकमा कांग्रेसलगायत संसदमा प्रतिपक्षमा रहेका राजनीतिक दलहरू सहकारीको रकम हिनामिना, अपचलन भएको सम्बन्धमा छानबिन गर्नका लागि संसदीय छानबिन समिति गठन गर्ने प्रक्रिया निस्कर्षउन्मुख रहेको बताए । उनले सत्तापक्षसँग सोमवार भएको सहमतिलाई अनुमोदन गर्ने निर्णय गरेको बताएका छन् ।

पत्रकारहरूसँग कुरा गर्दै लेखकले भने, ‘हिजो संघीय संसदमा भएका मुख्य राजनीतिक दलहरूको बीचमा संसदीय छानबिन समिति गठन गरेर जाने सहमति भयो । कार्यादेशमा पनि सहमति भयो ।’

‘कति सदस्यीय समिति हुने, अवधि कति हुने भन्ने सहमति पनि भयो । त्यो सहमति निस्कर्षउन्मुख सहमति भनेका छौँ’, उनले भने ।

‘निष्कर्षमा पुग्ने स्थिति बनेको छ’, लेखकले भने, ‘निस्कर्षउन्मुख सहमतिलाई कांग्रेस संसदीय दलको बैठकले अनुमोदन गरेको छ ।’

कांग्रेसका प्रमुख सचेतक लेखकले समग्र सहकारीको बारेमा कानूनी र संस्थागत प्रबन्धको अनुगमन, उचित मूल्यांकन हुने कुरामा विशेष जोड दिनुपर्ने बताएका छन् ।

राष्ट्रिय स्वतन्त्र पार्टी (रास्वपा)का सभापति समेत रहेका गृहमन्त्री रवि लामिछानेले सूर्यदर्शन लगायतका सहकारीको करोडौं रकम अपचलान र ठगी गरेर गोरखा मिडिया नेटवर्क प्रालिमा लगेको भन्दै अनुसन्धानका लागि कांग्रेसले संसदीय छानविन समितिको माग गरेको थियो । समितिमा लामिछानेको नाम उल्लेख नरहे पनि गोरखा मिडियामा संलग्न रहेका व्यक्तिहरूमाथि अनुसन्धान गर्ने विषय उल्लेख छ ।

Published : Tuesday, 2024 May 28, 2:14 pm

फेसबुकबाट तपाईको प्रतिक्रिया