काठमाडौं । नेपाल प्रहरीका प्रहरी वरिष्ठ उपरीक्षक (एसएसपी)बाट प्रहरी नायव महानिरीक्षक (डीआइजी) पदमा पदोन्नति भएका ४ जनालाई दर्ज्यानी चिन्ह प्रदान गरिएको छ ।

सोमबार प्रहरी हेडक्वाटर नक्सालमा आयोजित विशेष कार्यक्रममा प्रहरी महानिरीक्षक (आइजीपी) बसन्तबहादुर कुँवरले चार डीआइजीलाई दर्ज्यानी चिन्ह प्रदान गरेका हुन् ।

डीआइजीहरू कृष्णहरि शर्मा पोखरेल, दानबहादुर कार्की, मनोजकुमार केसी र राजन अधिकारीलाई दर्ज्यानी चिन्ह प्रदान गरिएको विज्ञप्तिमा उल्लेख छ ।

यी चार जना डीआइजीबाटै भावी आइजीपी हुनेछन् । हालका आइजीपी कुँवरको कार्यकाल सम्पन्न भएपछि केही महिनाका लागि एआइजीद्वय दीपक थापा र सुदीप गिरीमध्य एकजना आइजीपी हुनेछन् । त्यसपछि यी चार जनामध्यबाट एकजना आइजीपी बन्नेछन् । डीआइजी पोखरेल हालका आइजीपी कुँवरसँग अवकासमा जानेछन् । त्यसपछि आइजीपीका लागि पहिलो नम्बरमा डीआइजी कार्की रहनेछन् । केसी दोस्रो र तेसो नम्बरमा अधिकारी रहनेछन् ।

नेपाल सरकार गृह मन्त्रालय (सचिवस्तर) को २०८१ जेठ ६ गतेको निर्णयानुसार प्राविधिक प्रहरी वरिष्ठ नायव निरीक्षकबाट प्राविधिक प्रहरी निरीक्षक पदमा पदोन्नति भएका प्राविधिक प्रहरी निरीक्षक भगवानप्रसाद कुशवाहलाई पनि दर्ज्यानी चिन्ह प्रदान गरिएको छ ।

आइजीपी कुँवरले राष्ट्र, जनता र संगठनप्रति गरेको योगदान, कार्यक्षमता लगायतका बढुवाका सम्पूर्ण संभाव्य आधारहरूको मूल्याङ्कन गरी पदोन्नति गरिएको बताएका छन् ।

कुँवरले संगठनको वृहत्तर हितको कुरा गर्दा पद वा व्यक्ति गौण हुने र संगठनले दिएको जिम्मेवारी प्रमुख हुन आउने बताए ।
डीआइजी कृष्णहरि शर्मा पोखरेलले राज्य र संगठनले दिएको जिम्मेवारीलाई व्यावसायिक निष्ठाकासाथ राष्ट्र र नागरिकको सेवामा गम्भीर भएर पूरा गर्ने बताए ।