काठमाडौं । राजस्व चुहावट मुद्दाका फरार प्रतिवादी पक्राउ २९ वर्षीया कुमारी गुरूङ र ४१ वर्षीय प्रदीपकुमार गुप्तालाई प्रहरीले पक्राउ गरेको छ ।

धादिङको बेनीघाट रोराङ गाउँपालिका–५ ठेगाना भएकी न्यू समीक्षा सप्लायर्सकी प्रोप्राइटर गुरूङ र पर्साको वीरगंज महानगरपालिका–८ ठेगाना भएका सोही सप्लायर्सका बैंक खाता संचालक गुप्तालाई बुधबार प्रहरीले पक्राउ गरेको विज्ञप्तिमा उल्लेख छ ।

उच्च अदालत पाटनको २०७९ भदौ २५ गतेको फैसलाले राजस्व चुहावट मुद्दामा जनही १/१ वर्ष कैद र १२ करोड १० लाख ३६ हजार ५ सय ३० रूपियाँ जरिवाना सजाय ठहर भई फरार रहेका उनीहरूलाई केन्द्रीय अनुसन्धान व्यूरो लाजिम्पाटबाट खटिएको प्रहरीले चितवनको भरतपुरबाट पक्राउ गरेको हो ।

उनीहरूले न्यू समीक्षा सप्लायर्स नामको फर्म दर्ता गरी एकआपसमा मिलोमतो गरी मालवस्तु खरिद बिक्री नगरी नक्कली कर बिजक जारी गरी संकलन भएको मूल्य अभिवृद्धि कर र आम्दानीमा कानून बमोजिम तिर्नुपर्ने आयकर रकम समेत नतिरी राजस्व चुहावट गरेकोमा अदालतले उनीहरू विरूद्ध उक्त कैद तथा जरिवाना सजाय फैसला गरेको थियो ।

उनीहरूलाई फैसला कार्यावन्यनको लागि काठमाडौं जिल्ला अदालतमा पेश गरिएको छ ।