काठमाडौं । नेपाली कांग्रेसको महासमिति बैठकमा राजनीतिक, सांगठनिकसहितका प्रस्तावहरू पेश हुने भएका छन् ।

मंगलबार बिहान ९ बजेदेखि बैठक शुरु हुनेछ । प्रस्तावमा सामूहिक छलफलहरू हुनेछन् ।

विभिन्न समूहमा रहेर नीति, सांगठनिक, समसामयिक, अर्थ र लेखासम्बन्धी प्रस्तावहरूमाथि छलफल हुनेछ ।

बन्दसत्रमा उपसभापति पूर्णबहादुर खड्काको नीति प्रतिवेदन, महामन्त्री गगनकुमार थापाको सांगठनिक प्रतिवेदन, महामन्त्री विश्वप्रकाश शर्माको समसामयिक प्रतिवेदनमाथि छलफल हुन लागेको छ ।

अर्थमन्त्री समेत रहेका डा. प्रकाशशरण महतको अर्थतन्त्रको वर्तमान अवस्था र चुनौतीबारे र श्याम घिमिरेको लेखा सम्बन्धी प्रतिवेदन पनि पेश हुनेछन् ।

महामन्त्री थापाले गठबन्धनका कारण ठूलो दल भएको भन्दै गठबन्धनलाई बलियो बनाउँदै आगामी चुनावमा एकल बहुमत ल्याउने गरी सशक्त रुपमा जाने प्रस्ताव पेश गर्नेछन् ।

नेपाली कांग्रेसको महासमिति बैठक ललितपुरको गोदावरीमा सभापति शेरबहादुर देउवाले सोमबार उदघाटन गरेका थिए ।

नीति महाधिवेशनको रुपमा समेत लिइएको महासमिति बैठक फागुन १० गतेसम्म चल्नेछ ।