उदयपुरका तामाङ स्वयम्भूबाट पक्राउ

काठमाडौं । रसिया पठाइदिन्छु भन्दै रकम ठगी गरेको अभियोगमा प्रहरीले ३० वर्षीय मिलन तामाङलाई पक्राउ गरेको छ ।

१ लाख ६५ हजार रूपियाँ ठगी गरेको अभियोगमा उदयपुरको उदयपुरगडी गाउँपालिका–९ ध्वासे फूलबारी घर भई काठमाडौंको स्वयम्भू बस्ने तामाङलाई बुधबार दिउँसो प्रहरीले पक्राउ गरेको विज्ञप्तिमार्फत जनाएको छ ।

तामाङले २ जनालाई वैदेशिक रोजगारीका लागि रसिया पठाई कन्स्ट्रक्सनमा मासिक १ लाख रूपियाँ तलबमा काम लगाइदिन्छु भन्दै प्रलोभनमा पारेका थिए ।

पीडितहरूबाट पटक पटक गरी तामाङले रकम ठगी गरेको खुल्न आएको छ । काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरीले तामाङलाई काठमाडौं सामाखुशीबाट पक्राउ गरेको हो ।

उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको छ ।

Published : Thursday, 2024 February 15, 8:32 pm