प्रधानमन्त्रीद्वारा सभापति देउवा र अध्यक्ष नेपालसँग परामर्श

काठमाडौं । प्रधानमन्त्री समेत रहेका नेकपा (माओवादी केन्द्र)का अध्यक्ष पुष्पकमल दाहालले दुई शीर्ष नेताहरूसँग परामर्श गरेका छन् ।

बुधबार बिहान बालुवाटारमा दाहालले नेपाली कांग्रेसका सभापति शेरबहादुर देउवा र नेकपा (एकीकृत समाजवादी)का अध्यक्ष माधवकुमार नेपालसँग पछिल्लो राजनीतिक अवस्थाका बारेमा छलफल गरेका हुन् ।

एनसेलको शङ्कास्पद शेयर खरिद–बिक्रीबारे चर्चा र बहस भइरहेका बेला सत्तारुढ तीन दलका नेताहरूबीच भेटवार्ता र छलफल भएको छ ।

तीन शीर्ष नेताहरूका बीच छानबिनका लागि समिति गठन गर्नेबारे कुराकानी भएको बुझिएको छ ।

मंगलबार गठबन्धन दलका नेताहरूबीच छलफल भएको थियो । छलफलमा एनसेल बिक्रीको कारोबार शंकास्पद भन्दै छानबिन गर्ने सहमति जुटेको थियो ।

सरकारले छानबिन समिति भने गठन गरिसकेको छैन । बुधवार संसद्का २ वटा संसदीय समितिमा पनि एनसेलबारे बहस भएको छ ।

लेखा समिति र अर्थ समितिमा एनसेल बिक्रीबारे छलफल भएको छ । एक खर्ब ४३ अर्बको एनसेल ६६ अर्बमा बेचेको सार्वजनिक भएपछि बबाल भएको छ ।

Published : Wednesday, 2023 December 6, 11:00 pm

फेसबुकबाट तपाईको प्रतिक्रिया