पन्ध्र एसएसपीहरूको सरुवा र काज, ५ जनाको पदस्थापना

काठमाडौं । नेपाल प्रहरीको प्रहरी प्रधान कार्यालय नक्सालले १५ जना प्रहरी वरिष्ठ उपरीक्षक (एसएसपी)को सरूवा र काज गरेको छ ।

बिहीबार प्रहरी प्रधान कार्यालयले सरूवा सूची सार्वजनिक गर्दै १५ जना एसएसपीको सरूवा गरेको हो ।

एसएसपी दानबहादुर कार्कीको नेपाल प्रहरी प्रधान कार्यालय, नक्सालस्थित प्रहरी महानिरीक्षकको सचिवालयमा काज सरूवा भएको छ ।

कार्की यसअघि जिल्ला प्रहरी परिसर, काठमाडौंमा कार्यरत थिए ।

एसएसपी भूपेन्द्रबहादुर खत्रीलाई जिल्ला प्रहरी परिसर काठमाडौंमा सरुवा गरिएको छ । यसअघि नै खत्री परिसर आएका थिए ।

कर्णाली प्रदेश प्रहरी कार्यालय अपराध नियन्त्रण तथा अनुसन्धान महाशाखा वीरेन्द्रनगरमा रहेका गोपालचन्द्र भट्टराईको बागमती प्रदेश प्रहरी कार्यालय उपराध तथा अनुसन्धान महाशाखा हेटौंडामा सरूवा भएको छ ।

बागमती प्रदेश प्रहरी कार्यालय शान्ति सुरक्षा महाशाखा हेटौंडामा रहेका दीपक रेग्मीको नेपाल प्रहरी प्रदेश कार्यालय पोखरामा सरूवा भएको छ ।

नेपाल प्रहरी प्रधान कार्यालय महिला तथा बालबालिका तथा जेष्ठ नागरिक सेवा निर्देशनालय नक्सालका सानुराम भट्टराईको राष्ट्रिय सुरक्षा परिषद्को सचिवालय सिंहदरबारमा सरूवा भएको छ ।

प्रहरी प्रधान कार्यालयले ५ जना एसएसपीहरूको पनि पदस्थापना गरेको छ ।