काठमाडौं । प्रेस काउन्सिल नेपालले यो वर्षको प्रेस काउन्सिल पत्रकारिता पुरस्कार अग्रज पत्रकार महिला निर्मला शर्मालाई प्रदान गर्ने निर्णय गरेको छ ।

करिब तीन दशकदेखि नेपाली पत्रकारिताको विभिन्न विधामा रही सामाजिक रुपान्तरण, लैंगिक न्याय र प्रेस तथा अभिव्यक्ति स्वतन्त्रताको पक्षमा निरन्तर कलम उठाउँदै आउनुभएका शर्मालाई उक्त पुरस्कार प्रदान गर्ने निर्णय भएको हो । यो पुरस्कारको राशि एक लाख ५१ हजार रुपियाँ रहेको छ ।

नेपाली पत्रकारिता क्षेत्रमा आजीवन समर्पित भएर पत्रकारिताको संस्थागत विकास र प्रतिष्ठाको निम्ति अद्वितीय योगदान दिएकी प्रेस काउन्सिलका पूर्व अध्यक्ष स्व.गोपालदास श्रेष्ठको योगदानलाई चिरस्मरणीय बनाउन र उनको स्मृतिमा यो पुरस्कार स्थापना भएको हो ।

२०५२ सालदेखि विभिन्न मिडिया काम गर्दै आएकी निर्मला शर्मा पछिल्लो समय समकोण टिभी कार्यक्रमको उत्पादक तथा प्रस्तोता हुन् । शर्मासँग बिगत २८ वर्षदेखि निरन्तर रुपमा विभिन्न सञ्चार माध्यममा रिपोर्टर हुदै सम्पादकीय नेतृत्वमा रहेर काम गरेको अनुभव छ ।

उनले श्री सगरमाथा र एभरेष्ट हेराल्ड राष्ट्रिय दैनिक पत्रिकाको रिपोर्टर, रेडियो नेपाल र रेडियो नेपालको घटना र बिचार कार्यक्रमको रिपोर्टर, सारथी साप्ताहिक, रेडियो सगरमाथामा लामो समय रिपोर्टर भई काम गरेकी छिन् ।

कान्तिपुर एफ.एम. र उज्यालो एफ. एफ.मा पनि दुई वर्ष साप्ताहिक रुपमा कार्यक्रम चलाएकी शर्माले पोखराबाट प्रकाशन हुँदै आएको आदर्श समाज दैनिकको संवाददाता भएर केहि वर्ष काम गरेकी थिइन् ।

हाल उनी खोज पत्रकारिता केन्द्रको उपाध्याय, दक्षिण एशियाली पत्रकार महिला सन्जाल (स्वाम) नेपालको अध्यक्ष र नेपाल पत्रकार महासंघको सल्हाहकार पनि रहेकी छिन् ।

महिला पत्रकारहरूको साझा संस्था सन्चारिका समूहको दुई कार्यकाल अध्यक्ष भएको बेला देशभरिका पत्रकारितामा महिलाहरूको संख्या बढाउनका लागि तालिम र गुणात्मक वृद्धिका लागि पनि काम गरेको अनुभव छ । उनी महिला खबर डटकमको संस्थापक अध्यक्ष पनि हुन् ।

बिक्रम संवत् २०६२/६३ को जनआन्दोलनमा जनअधिकार र प्रेस स्वतन्त्रताको लागि पत्रकार महासंघको केन्द्रीय सदस्य र दक्षिण एसियाली पत्रकार संगठनको महासचिवको रुपमा महत्वपूर्ण भूमिका निर्वाह गरेकी छिन् ।

उनले विभिन्न दैनिक, साप्ताहिक, म्यागेजिन र अनलाइनमा समसामयिक विषयमा लेख लेख्दै आएकी छिन् ।

काउन्सिलले विक्रम संवत् २०५७ सालमा पहिलोपल्ट यो पुरस्कार अग्रज पत्रकार गोविन्द वियोगीलाई प्रदान गरेको थियो । गत वर्ष यो पुरस्कार अग्रज पत्रकार हरिबहादुर थापा र त्यस अघि काउन्सिलका संस्थापक समेत रहेका अग्रज पत्रकार भारतदत्त कोइरालाले प्राप्त गरेका थिए ।

प्रेस काउन्सिलबाट उक्त पुरस्कार पाउने शर्मा पहिलो पत्रकार महिला हुनन । प्रेस काउन्सिल स्थापनाको ५४ वर्ष पुगेको अवसरमा यही असोज ६ गते शनिबार सम्माननीय राष्ट्रपति रामचन्द्र पौडेलको समुपस्थितिमा शर्मालाई उक्त पुरस्कार र प्रमाणपत्र प्रदान गरिनेछ ।

सोही दिन यो वर्षको प्रेस काउन्सिल सुरेन्द्रबहादुर बस्नेत, सशक्त सञ्चारकर्मी, आचारसंहितासहितका पुरस्कार समेत प्रदान गरिनेछ ।

पत्रकारितामा लामो समयदेखि योगदान पुर्‍याएका विभिन्न पत्रकारलाई सम्मानसहित वार्षिकोत्सव मनाउने तयारी समेत भइरहेको छ ।