काठमाडौं । नेपाली कांग्रेस सांसद गगन थापाले जन्मकैदको सजाय भोगिरहेका तत्कालीन माओवादी नेता बालकृष्ण ढुंगेललाई रिहा गर्ने सरकारको निर्णय गलत भएको टिप्पणी गरेका छन् ।

संसदमा विशेष समय लिएर बोल्दै सांसद थापाले सरकारको चर्को आलोचना गरे । थापाले गणतन्त्रमा राजाले जस्तो प्रधानमन्त्रीले कैदीको चालचलन ठीक र गलत भनेर निर्णय गर्न नमिल्ने तर्क गरे ।

द्वन्द्वकालका मुद्दालाई सत्य निरुपण तथा मेलमिलाप आयोगले टुंगो लगाउने अझ ढुंगेलको मुद्दामा सम्मानित अदालतले पटकपटक जन्मकैदको फैसला गरेकाले उनलाई रिहा गर्नु कानूनी तथा राज्यको उपहास भएको थापाले बताए ।

‘चालचलन ठीक भएको भन्दै जन्मकैदको सजाय पाएका व्यक्तिलाई रिहा गरिएको छ । यसले कानूनी राज्यको खिल्ली उडाएको छ’, संसदमा बोल्दै थापाले भने, ‘यो गणतन्त्र हो । हिजो राजा होइबक्सन्थ्यो । आज गणतन्त्रमा सम्माननीय प्रधानमन्त्री राजा होइबक्सन्न । राजाले चालचलन ठीक भयो भनेर कसैलाई माफी दिन सक्ने । तर, प्रधानमन्त्रीलाई चालचलन ठीक लाग्यो भन्दैमा कसैलाई छुट दिने अधिकार छैन । यो कानूनी राज्य हो ।’