काठमाडौं । नेपाली कांग्रेस नेतृत्वको सरकारले स्पाइनल कर्ड इञ्जुरी भएका व्यक्तिलाई दिन गरिएको निर्णयलाई केपी ओली नेतृत्वको कम्युनिस्ट सरकारले उल्ट्याइदिएको छ ।

कम्युनिस्ट प्रधानमन्त्री ओलीले स्पाइनल कर्ड इञ्जुरी भएका व्यक्तिहरूलाई जीविकोपार्जनका लागि दिने भनिएको भत्ता नदिने भएका हुन् । स्वास्थ्य राज्यमन्त्री पद्मा अर्यालले पनि यो भत्ता दिनेबारेमा रुचि देखाएकी छैनन् ।

तत्कालीन प्रधानमन्त्री शेरबहादुर देउवाको सरकारले २०७४ साल पुस १३ गते मन्त्रिपरिषदबाट निर्णय गरेर स्पाइनल कर्ड इञ्जुरी भएको व्यक्तिहरूलाई जीविकोपार्जन भत्ता दिने निर्णय गरेका थिए । यो निर्णयलाई कम्यनिस्ट सरकारले खारेज गरिदिएको हो ।

कम्युनिस्ट सरकारले आफ्नो नीति तथा कार्य योजना आर्थिक वर्ष ७५–७६ को बजेटमा जीविकोपार्जन भत्ताको लागि रकम नछुट्टाएको भन्दै पीडितहरूले स्वास्थ्य मन्त्रालय र सरकारलाई ज्ञापनपत्र समेत बुझाएका छन् ।

माग पूरा नभए उनीहरूले ओली नेतृत्वको कम्युनिस्ट सरकारविरुद्ध आन्दोलन गर्ने चेतावनी दिएका छन् ।

ओली सरकारलाई दवाव दिन विभिन्न कार्यक्रम समेत सुरु भइसकेका छन् । कार्यक्रममा सहभागी हुन सम्पूर्ण स्पाइनलमा चोट लागि अपांगता भएकाहरूलाई सहभाग हुन पनि स्पाइनल कर्ड इञ्जुरी संघर्ष समितिले आह्वान गरेको छ ।