भरतपुर । नेपाली कांग्रेसका महामन्त्री डा शशांक कोइरालाले क्रियाशील सदस्यतामा पुनःविचार गर्नुपर्ने समय आएको बताएका छन् ।

चितवनमा नेपाल शिक्षक संघको २९औँ स्थापना दिवसका अवसरमा आइतबार आयोजित कार्यक्रममा डा.कोइरालाले क्रियाशील सदस्य मात्रै भएर निर्वाचन नजितिने बताए । ‘मेरो निर्वाचन क्षेत्रको कुनै एक वडामा एक हजार २०० क्रियाशील सदस्य छन् तर भोट जम्मा २०० खस्छ’, उनले भने, ‘अब के यसरी पार्टी चल्न सक्छ ?’

क्रियाशील सदस्यहरूको विषयमा महासमिति बैठकबाट प्रस्ताव पारित गरी पुनःविचार गर्ने महामन्त्री डा.कोइरालाको भनाइ थियो ।

अहिलेको निर्वाचनबाट कांग्रेसले पाठ सिकेको डा.कोइरालाले बताए । उनले भने, ‘अब क्रियाशील सदस्यहरूको सबै जानकारी राख्ने काम पार्टीले गर्नु आवश्यक छ । त्यसको तयारी भइरहेको छ ।’

कांग्रेसले क्रियाशील सदस्यहरूको जानकारी राख्ने र उनीहरूको योगदानअनुसारको जिम्मेवारी दिने गरी काम गरिने महामन्त्री डा.कोइरालाले बताएका छन् ।

अबको समयमा कांग्रेसमा एकता हुनु जरुरी रहेको डा.कोइरालाको भनार्इ थियो । कांग्रेसभित्र एकता आयो भने वाम गठबन्धन पनि डराउने बताउँदै उनले पार्टीभित्रको एकता अहिलेको समयमा आवश्यक रहेको बताए ।