मोदीको चाकडी गर्न खोज्दा यसरी चिप्लिए मुख्यमन्त्री राउत

जनकपुरधाम । भारतीय प्रधानमन्त्री नरेन्द्र मोदीको नागरिक अभिनन्दन कार्यक्रममा प्रदेश २ का मुख्यमन्त्री लालबाबु राउतले दिएको सम्बोधन विवादित बन्न पुगेको छ ।

जनकपुरधामको बाह्रविघामा शुक्रबार आयोजित नागरिक अभिनन्दनका क्रममा विभेदकारी संविधानविरुद्ध आफूहरूको संघर्ष जारी रहेको भनेर मुख्यमन्त्री राउतले अभिव्यक्ति दिएपछि विरोध भएको हो ।

राउतले विभेदकारी संविधान र प्रादेशिक अधिकारका लागि आफूहरूको संघर्ष जारी रहेको बताएका थिए । राउतको अभिव्यक्ति आपत्तिजनक रहेको जनकपुरवासीले नै प्रतिक्रिया दिएका छन् ।

राउतले भारतीय प्रधानमन्त्री मोदीको ध्यानाकार्षण गराउने गरी ‘हाम्रो संघर्ष आज पनि विभेदकारी संविधान र प्रादेशिक अधिकारका लागि जारी छ’ भनेर बोलेका थिए । मुख्यमन्त्री राउतको दल संघीय समाजवादी फोरम नेपालका अध्यक्ष उपेन्द्र यादवले समेत सो अभिव्यक्तिको आलोचना गरेका छन् ।

राउतले मोदीको ध्यानाकर्षण गराउँदै भने, ‘हामी नेपालको अभिन्न अंग हौं । हामीले चाहेका छौं कि हाम्रो मुलकमा पनि विना विभेदभाव, कुनै पनि जाति, वर्ग, समुदायले राज्यका हरेक तह, तप्का र निकायमा उसको क्षमता र योग्यताले पुग्न सक्ने सहज अवसर मिलोस्, जसरी सामान्य परिवारको भएर पनि महामहिमज्यू भारतको सर्वोच्च पदमा विराजमान हुनुहन्छ ।’

राज्यको विभेदकारी नीतिका कारण मधेस अझै आर्थिक रुपमा पिछडिएको मुख्यमन्त्री राउतले बताए । राउतले सम्बोधनको क्रममा भनेका थिए, ‘राज्य मधेसप्रति पूर्वाग्रही छ, विद्वेषपूर्ण मानसिकताका कारणका मधेसका वासिन्दा तुलनात्मक रुपमा अत्यधिक गरिब, वेरोजगारी, अभावग्रस्त, शोषित, उत्पीडित जीवन जिउन विवश छन् ।’

Published : Friday, 2018 May 11, 7:21 pm

यसमा तपाइको मत

तपाइको इमेल गोप्य राखिनेछ

फेसबुकबाट तपाईको प्रतिक्रिया