काठमाडौं । विवेकशील पार्टीका संयोजक एवम् काठमाडौं क्षेत्र नं. ५ मा प्रतिनिधी सभाका उम्मेदवार उज्ज्वल थापाले एमालेका महासचिव तथा उम्मेदवार ईश्वर पोख्रेलले पानी ट्यांकीमा पैसा लुकाएको प्रकरण नेपाली जनताले भुल्न नसक्ने बताएका छन् ।

एक अनलाइनलाई दिएको आफ्नो अन्तर्वार्ताका क्रममा संयोजक थापाले राजा ज्ञानेन्द्र शाहको सक्रिय शासनकालमा प्रतिगमन आधा सच्चियो भनेर ईश्वर पोख्रेल आपूर्ति मन्त्री बनेको सुनाउँदै एमालेको पक्षमा काठमाडौं क्षेत्र नं. ५ का मतदाता नहरकोे बताए ।

‘ईश्वरजी दुईचोटि हारिसक्नुभयो । पहिले जित्नुभएको थियो, पछि लगातार हार्नुभयो । उहाँ त्यति लोकप्रिय नेता होइन’, उनले भनेका छन्, ‘पानी ट्यांकीको प्रकरण अझै ताजै छ । प्रतिगमन आधा सच्चियो भनेर राजाको सरकारमा मन्त्री खान गएको पनि जनताले बिर्सिएका छैनन् ।’

विवेकशील साझा पार्टीलाई जनताले मतदान गर्ने थापाको भनाइ छ । ‘ईश्वर पोख्रेललाई भन्दा विवेकशील साझा पार्टीलाई मतदाताले मन पराउनु हुन्छ’, उनले भनेका छन्, ‘म केही गर्न चाहन्छु ।’