घोराही । शहीद उमेश थापाको हत्यामा संलग्न आरोपीलाई नेकपा (एमाले) दाङले प्रदेश सभाका लागि समानुपातिकमा टिकट दिएपछि शहीद पत्नी लक्ष्मी थापाले असन्तुष्टि जनाएकी छिन् ।

रिपब्लिका दैनिकसँगको कुराकानीमा शहीद पत्नी लक्ष्मीले भनिन्, ‘पार्टीगत रुपमा भन्नु हुन्छ भने एमाले दाङको निर्णय मलाई स्वीकार्य छ । तर, व्यक्तिगत रुपमा भन्नु हुन्छ भने बलिभद्र रानालाई समानुपातिकमा टिकट दिएकोप्रति असहमति छ ।’ बलिभद्र रानाभन्दा सक्षम र जुझारु नेताहरू दाङ जिल्लामा एकसे एक रहेको उनले बताइन् ।

अखिल नेपाल महिला संघ दाङकी राष्ट्रिय परिषद् सदस्य लक्ष्मी थापाले जनआन्दोलनका दोषीलाई एमालेले टिकट किन दिएको होला भनेर धेरैले आफूसँग प्रश्न सोध्ने गरेको पनि सुनाइन् । उनले यस विषयमा धेरै बोल्न आफू अनुच्छुक रहेको समेत बताएकी थिइन् ।

समानुपातिकमा लक्ष्मी थापाको नाम दाङ एमालेले सिफारिस गरेको थियो । तर, उनलाई एमालेले टिकट दिएन । बरु रानाले टिकट पाए ।

‘तपाईले मात्रै होइन उमेश थापाको हत्यामा संलग्नलाई एमाले दाङले किन टिकट दिएको भनेर धेरैले प्रश्न गर्नु हुन्छ’, उने भनिन् ।
०६२/६३ को जनआन्दोलनका बेला राजा ज्ञानेन्द्र शाहको नियुक्ति पाएर घोराही नगरपालिकाको मेयर बनेका तत्कालीन राप्रपा नेपालका नेता बलिभद्र राना नेपाली सेनाको गाडीमा चढेर आएको र सोही बेला गोली चलाउन आदेश दिएको आरोप छ । रानाले सो घटनामा आफ्नो संलग्नता नरहेको दाबी गर्दै आएका छन् । तर, दङ्गाली जनता रानाको सो भनाई मान्न तयार छैनन् । एमाले र माओवादी केन्द्रले बलिभद्र रानाको त्यो आदेश भुलेपनि अरुले भेलेका छैनन् भन्छन् मतदाताहरू ।

बलिभद्र रानाको आदेशले नेपाली सेनाले गाली चलाउँदा उमेश थापाको मृत्यु भएको भन्दै सोही बेला नेकपा (एमाले) दाङ जिल्ला कमिटीको बैठक बसेर रानालाई कारबाहीको माग गरेको थियो । त्यस बेला एमाले दाङको अध्यक्ष शोभाराम बस्नेत थिए ।

एमाले दाङका तत्कालीन अध्यक्ष बस्नेतले रिपब्लिका दैनिकसँग कुरागर्दै उमेश थापाको हत्या गर्नमा प्रमुख दोषी रहेको भनेर त्यस बेला जिल्ला कमिटीले बलिभद्र रानालाई कारबाहीको माग गर्ने निर्णय गरेको स्वीकारे । ‘तत्कालीन एमालेको जिल्ला कमिटीले बलिभद्र रानालाई उमेश थापाको हत्याको दोषी ठानेको थियो । कारबाहीको माग गरेको थियो’, उनले भने, ‘यस्तै रहेछ । राजनीति हो । पार्टीले गरेको निर्णयलाई हामीले मान्नै पर्‍यो !’

त्यति मात्रै होइन जनआन्दोलनका बेला तुलसीपुर चौराह, राप्ती सुपरलज अगाडि लगायतका स्थानमा आमसभा र कोणसभाहरूमा ‘उमेश थापाको हत्यारा बलिभद्र रानालाई कारबाही गर’ भनेर भाषणा गरेको अहिले जस्तै लाग्ने दाङका विभिन्न दलका नेताहरू बताउँछन् ।

एमाले दाङ जिल्ला कमिटीका एकजना सदस्यले नाम उल्लेख नगर्ने सर्तमा भने, ‘शंकर पोख्रेलले बलिभद्र रानासँग निर्वाचन खर्चवापत पैसा लिएर टिकट दिएका हुन् । शंकर पोख्रेलले दाङ जिल्लाको संगठन भताभुङ्ग बनाइ दिए ।’ एमालेभित्र होनहार नेताहरू रहेको भन्दै तीन नेताले भने, ‘संगठन गर्ने हामीले । अवसर पाउने दुई हप्ता अगाडि पार्टी प्रवेश गरेको मण्डलले ? एमाले दाङका नेता कार्यकर्ताको मनमा गाँठो परेको छ ।’

यसैबीच, नेकपा (एमाले) जिल्ला कमिटीका केही सदस्यहरूले हातले लेखेर रिपब्लिका दैनिकलाई पत्र पठाएर शंकर पोख्रेल र बलिभद्र रानाको चर्को विरोध गरेका छन् । उनीहरूले त्यस बेला एमालेले गरेको निर्णयलाई स्मरण गर्न सिङ्गो जिल्ला कमिटी दाङ र दाङ जिल्लाभरिका संगठित सदस्यहरूलाई अपील गरेका छन् ।

(जिल्ला कमिटी दाङका सदस्यहरूले मेलमार्फत पठाएको पत्र रिपब्लिका दैनिकसँग सुरक्षित छ । उहाँहरूकै आग्रहअनुसार गोपनीयताका कारण पत्रसर्वजनिक गरिएको छैन)