रसुवा । मतदाता शिक्षाको नाममा वाम गठबन्धनका कार्यकर्ताले रसुवा जिल्लामा निर्वाचन आचार संहिताकोे ठाडो उलंघन गर्दै विद्यालयमा कार्यक्रम संचालन गरेका छन् ।

जिल्लाको उत्तरगया गाउँपालिका ३ ठूलोगाउँमा रहेको श्री भूमेदेवी माध्यमिक विद्यालयमा मतदाता शिक्षाको नाममा आफनो गठबन्धनलाई मतदान गर्न गठबन्धनका कार्यकर्ताले कार्यक्रम संचालन गरेका हुन् ।

विद्यालय वरपर निर्वाचन सम्बन्धी गतिविधि सञ्चालन गर्न नमिल्ने भएपनि रसुवामा वाम गठबन्धनले विद्यालयभित्र गएर मतदाता शिक्षा सञ्चालन गरेर आचार संहिताको खिल्ली उठाए ।

गठबन्धनमा आबद्ध नेता तथा कार्यकर्ताले विद्यालयमा पुगेर कक्षा ७ देखि १० सम्मका विद्यार्थीलाई मतदान गर्ने तरिका सिकाएका थिए ।

नमूना मतपत्र बोकेर विद्यालय पसेका उनीहरुले आफ्नो चुनाव चिन्हमा मतदान गर्नका लागि आग्रह गरेका थिए ।

मतदान गर्नका लागि उमेर नपुगेका विद्यार्थीसामु पुगेका गठबन्धन आवद्ध दलका विद्यार्थी संगठन अनेरास्ववीयुका कार्यकर्ताले कलिला स्कूले विद्यार्थीलाई गठबन्धनको चुनाव चिन्ह हँसिया हथौडा र सूर्यमा मतदान गर्न आफ्ना अविभावकलाई सिकाउन प्रशिक्षण दिएका थिए ।

विद्यालय स्रोतका अनुसार प्रधानाध्यापक ऋषि अधिकारी काठमाडौं गएको समयमा उनीहरू निर्वाचन शिक्षा दिन विद्यालय पुगेका थिए ।

एमालेका प्रतिनिधिसभाका उम्मेदवार जनादर्न ढकालका अनुसार अनेरास्ववियुमा आवद्ध विद्यार्थीलाई मतदान गर्ने तरिका सिकाइएको बताए ।

आचार संहिता विपरित विद्यालयमा कार्यक्रम गरेको बारे जिल्लाका सरोकारवाला निकायहरू बेखबर रहेका छन् ।

विद्यालयमा निर्वाचन शिक्षा सञ्चालनका नाममा पार्टीको प्रचार प्रसार भएको बारेमा आफूलाई जानकारी नआएको रसुवाका प्रमुख जिल्ला अधिकारी हीरादेवी पौडेलले बताइन् ।

लोकतान्त्रिक गठबन्धनलाई आचारसंहिता उल्लङ्घन गरेको आरोप लगाउँदै हिँडेका वाम गठबन्धनले आचारसंहिता मिच्दै हिँड्दा समेत मुख्य निर्वाचन अधिकृतको कार्यालय, जिल्ला निर्वाचन कार्यालय र जिल्ला प्रशासन कार्यालयले कार्वाहीको प्रक्रिया अगाडि बढाएका छैनन् ।