रोल्पा । नेकपा (एमाओवादी केन्द्र)का नेता तथा दाङ क्षेत्र नं. २ का प्रतिनिधि सभा उम्मेदवार कृष्णबहादुर महराले आफू रोल्पाबासी भएको भन्दै रोल्पाभन्दा बाहिर जान नसक्ने बताएका छन् ।

रोल्पाबाट निर्वाचनमा प्रतिस्पर्धा गर्दै गरेका आफ्नो पार्टीको प्रतिनिधिसभातर्फका उम्मेदवार वर्षमान पुनको चुनावी कार्यक्रममा सहभागी हुन पुगेका महराले रोल्पाका मतदाताहरूसँग दाङभन्दा आफ्ना लागि रोल्पा नै प्यारो रहेको बताएका हुन् । उनले वर्षमान पुनसहितका प्रदेश सभाका उम्मेदवारहरू मतदान गरेर जिताउन आपील गरे ।

‘प्राविधिक कारणले म दाङबाट चुनावमा प्रतिस्पर्धा गर्दैछु । जित्छु पनि । एमालेले साथ दिएको छ’, चुनावी कार्यक्रमलाई सम्बोधन गर्दै महराले भने, ‘मैले गर्ने भनेको रोल्पा हो । दाङ होइन ।’ यद्यपि, नेता महराले दाङको क्षेत्र नं. २ मा धेरै विकासका कार्यक्रमहरू ल्याएको दाबी गरे ।

रोल्पा जिल्लामा एउटा मात्रै निर्वाचन क्षेत्र रहेको छ । त्यो क्षेत्रमा वर्षमान पुनले कब्जा जमाएरपछि महरा बाध्य भएर दाङ झरेका हुन् ।

पहिलो संविधानसभा निर्वाचनमा महराले दाङ क्षेत्र नं. २ बाट निर्वाचित भएका थिए । त्यसपछि उनले दाङ छाडेर रोल्पाबाट निर्वाचन जिते ।

रोल्पामा टिकट नपाएपछि महरा फेरि दाङ झरेका छन् । महरालाई दाङका मतदाताहरूले ‘भगौडा’ नेताका रुपमा परिभाषित गर्ने गरेका छन् ।

एमालेका स्थायी समिति सदस्य शंकर पोख्रेललाई प्रदेश सभामा झार्न सफल भएका महराले एमालेकै बलबुतामा जित्ने सपना देखेका छन् । दाङ जिल्लामा माओवादी केन्द्र कमजोर मानिन्छ ।

शंकर पोख्रेलले पनि प्रदेश सभामा जित्ने सम्भावना निकै कम रहेको बताइएको छ ।

एमालेले महरालाई जिताउने सबै प्रकारको सहयोग गर्दै आएको छ । तर, महराले भने आफ्नो गृहजिल्ला रोल्पा पुगेर दाङ जिल्लाका मतदाताप्रति होच्याउने गरेर अभिव्यक्ति दिएका छन् ।

महरा सांसद रहेका बेला सांसद विकास कोषबाट आउने सबै रकम उनले रोल्पा जिल्लामा खर्च गरेका थिए । उनको विकास कोषबाट एकरुपियाँ पनि दङ्गालीहरूका लागि खर्च गरेका होइनन् । यो कुरा दाङ जिल्लाका मतदाताहरूले राम्रोसँग बुझेका छन् ।

माओवादीका नेताहरू पनि महरालाई अवसरवादी नेताका रुपमा लिन्छन् । अहिले पनि विनाविभागीय मन्त्रीका रुपमा सुविधा लिइरहेका महराले सत्ताको सधै स्वाद लिइरहने तथा अरु नेताहरूलाई अवसर दिन नमान्ने व्यक्ति देखाउने गरेको आरोप छ ।